هما مين الفسافيس
Monday, March 17, 2008 by الراقـــص مع الذئـــــاب
--------------------------------------------------------------------------------
السلام عليكم
@@@@@
الفسافيس!!... مين هما الفسافيس؟؟؟
طبعا من الاسم الغريب دا كلنا عاوزين نعرف مين هما الفسافيس
الفسافيس يا اخواني هما اسرة مصرية عادية جدا....
او مش عادية
المهم هي اسرة مصرية وخلاص
الاب وهنقول عليه ديما ابو الفسافيس افندي
والام وهي هنسميها المدام ام الفسافيس
والاولاد
فيسفس الكبير وهو لسا مخلص كلية
وبيدور علي شغل (قطع قلبي)
الانسة فسافس وهي البنت الوسطانية وهي في المرحلة الجامعية
وهنقولها فسافس هانم(من باب التريقة)
اما بقي اخر العنقود واسمه المفعوص فسفوس
وهو في المرحلة الثانوية (وجع دماغ يعين )هنكتب يوميات الفسافيس ونحاول نرمز بيها للمشاكل اللي بتحصلنا كل يوم
مش هنسيب اي حاجة
خلوا بالكم يا شباب......عائلة الفسافيس ناس علي نيتها اوي ...
وهيفضلوا زي ما هما كدا مهما طال بيهم الزمن
تعالوا بقي نتخيل كل شخصية كدا مع بعض عشان لما نبدأ القصص بتعتنا نبقي عايشين معاهم صح
------------------------------------------------------------------------
ابو الفسافيس افندي رجل في سن 52 سنة...
اصلع الرأس....بيلبس نظارة كعب كوباية(يعني شيش بيش)ديما شنبه كبير اوي ومنعكش.....
.سنانه صفرا من شرب القهوة الكتير
ديما ماسك جرنان في ايده ....
يمكن تتخيل من كتر الجرايد اللي قرأها انه مثقف....
بس هو للأسف مبيشتريش الجرايد الا عشان اخبار الرياضة....
هتقولي انه فاهم في الكورة.... برضو هقولك لا
المهم هو مش بيفهم في اي حاجة خالص
-------------------
العضو التاني في عائلة الفسافيس
المدام ام الفسافيس...
بصوا او ما هنجيب سيرتها تخيل انك شامم ريحة بصل وتقلية ودقية بميه وملوخية...
والعفار بيطلع منها لما تتحرك
ست بيت من الدرجة الاولي....بس فيها عيب صغير اوي....
ديما بتنسي الاكل علي البوتجاز وبيتحرق منها في كل مرة
علي نيتها اوي وبتحب كل الجيران(خلي بالك من الحتة بتاعت الجيران ديه)....
ومش بتعمل مشاكل عشان الغسيل بتاع الناس اللي تحتيها بينقط عليها (ازي الغسيل بتاع الناس اللي تحتيها بينقط عليها )ملكمش دعوة...
هو بينقط عليها وخلاص(اكيد عرفتم علاقتها حلوة ليه بالجران ....)
--------------------------
تعالوا بقي للفسافيس كدا ونتعرف عليهم
فيسفس الكبير
...
لسا مخلص كلية وبيدور علي شغل.....عامل نفسه ناصح وفاهم الدنيا ماشية ازاي....
وديما بيقول علي نفسه انه خسارة في البلد ديه .....ومن الاخر قافش علي الدنيا وقرفان منها
----
الانسة فسافس هانم
.................
....بنت مدلعة عشان مفيش بنات غيرها في البيت......
عندها مشكلة صغيرة اوي....
هي فاكرة نفسها انها جميلة وكل الناس هتموت وتكلمها....
طبعا مش هنقول شكلها عامل ازاي...
بس اكيد يعني واحدة اسمها فسافس هتتخيلوا شكلها ممكن يكون عامل ازاي
ربنا يسترها بقي
الانسة فسافس مبتعرفش تعمل اي حاجة في شغل البيت ...
عشان هي مش فاضية غير انها تقعد ادام المراية كل يوم بعد ما ترجع من الكلية
ماشاء الله متفوقة في درستها اوي....بتتطلع كل سنة بمادتين
وخلينا نعرفها اكتر من الموقف بتعتها في حكيتنا
-------
وأخيرا اخر العنقود المفعوص الصغير....فسفوس
ودا بقي اللي يطول عليه الكلام...
بس بإختصار هو واد روش وشقي وبتاع مقالب في سن ثانوي وبيلبس كاب ومسقط المنطلون لغاية لا مؤخذة ركبته....
يعني لسان حاله دائما يقول(ماما خلصت تعالي شطفيلي)...
دا كان شرح وتخيل لشكل عائلة الفسافيس ....ودمتم في خير
ملحووووووووووووووووووووووووظة...الحلقات اسبوعية ولا مؤخذه
ملحوظة تانية...اليوميات ديه كانت المفروض تتنشر في مجلة مشوار الحياة
بس محصلش....ولو وحصل فحقوق النشر محفوظة لأبو صابر اللي هو انا
مبرووووووووووووووووووك
قولت بس ابارك
واجي اعلق بكره
ابوالفسافيسسسسس
وفسفوس
ههههههههههههههههههههههه
مبدئيا كده شكلها هتبقى مدونه فقريه باذن الله
الصور ولا ارووووووووع
ابدعت الصراحه ف اختيارهم
وشكلها هتبقى عيله فل الفل
مستنينها بسررررررعه
والغى الوورد فريفكيشن وظبط الحياه كده
ومبروك للمره المليون
السلام عليكم ورحمة الله وبركاته
كده يا مهند تسبقني ، انا الحق عليا اني بقرأ الاول
ماشي مردودالك ان شاء الله ويلا بقي خليني ابارك واهني
:-)
الف الف مبروك يا محمد شكله كده هايبقي بلوج جامد ويوميات جامده ، هانستني الحلقه بشوق ، بس هي هاتنزل كل يوم ايه؟؟
ياريت تشيل الوورد فاريفكشن
:-)
وكمان اجدع بنوته ، ايه ده انتو واقفين علي الباب
:))))))))))))))))
ايه ده
والله احلي واحد المفعوص
ربنا يحميه
انا بحب المفاعيص اللي بيعملومقالب
التانيين شكلهم نكد وهي مش طالبه
مستنيه حكايات المفعوص ربنا يحميه
مبروك عليك المدونه
مبروك
اخيرا الفسافيس لقوا حد يدون لهم
مستنيين الحلقه الاولى
محمد الى هو ابو صابر الى هو انت
فكرتك تحفه ودمها خفيف جدا
وشكلنا كده هنتريق للصبح
حلوه حكايه غسيل الناس الى تحتها ده:))
بجد شوقتنى لأول بوست
فى انتظارك ياعزيزى ومبروك
تحياتى
شيماء:)
الف مليون مبروك للمدونة ولينا كمان ربنا يزيد ويبارك
يلا هنتظر بفارغ الصبر
ضحكت لما هلكت من الكلام اللي بتوصف العيلة بيه
متاااابعة
السلام عليكم
قريت البوست كله والله العظيم
اقسم بالله قريته كله
ايه المجلة اللي كانت هتتنشر فيها دي؟؟؟ ومن تأليف مين
شكلهم كده زي
simpson family
OR
the incredibles
بالتوفيق ان شاء الله
مسيو ابو صابر
ازيك يا افندم عامل ايه؟واحشنى كتير والله ونفسى اقعد معاك, بقى انا فى اسماعيليه من 6 شهور وانت اسمعلاوى ومش عارفين نتقابل كده!!ماااااشى
يارب تكون مرتاح فى الفرقة
المهم بقى الف مليون مبروك على المدونة الجديدة اللى باذن الله شكلها هتبقى روعه وكلامى دا مش مجامله والله بس متوقع لك خير باذن الله بس لو استمريت فى الكتابه بصفه دورية ومتتأخرش عن ميعاد البوست ابدا علشان الناس تتمتع باللى هتكتبه فى الوقت اللى هيتعودوا عليه منك
المدونة الاساسيه خلتنى اطلق عليك اسم ( دانسر)
فمش عارف دى بقى هتخلينى اقول عليك فسفس؟؟؟ههههههههه
يارب تكون بخير يا فسفس
سلام عليكم
بقى أنا كلفت نفسى وروحت جبت جاتو من كلاسيك بأد كده وقولت مدخلش عليهم بايدى فاضية ودى أول زيارة ملقيش ولا فسفوس فيهم ويقفلوا الباب فى وشى كمان تقولى ازاى قفلوا الباب فى وشك وهم مش موجودين أقولك ملكش دعوة ,,معلش اقتباس من حضرتك ,,الواضح انهم عيلة ملهاش فى الكاتو يعنى اقول بسطة أحسن ولا كنت دخلت عليهم باتنين كيلو برتقال وخلصنا ,وايه العيلة الكمل دى ,,المهم يا ابو صابر حنصبر عليك لحد ما نشوف حتقول ايه معاهم بس الفكرة جميلة جدا مش عارفة توعى على تمثيلية القاهرة والناس ولا مكنتش لسه اتولدت هى كانت مسلسل اجتماعى شادد الناس كلها عقبال الفسفيس بتوعك يعملوا فينا كده ,,بالتوفيق يا ابو صابر ان شاء الله وأشكرك جدا انك واضع اسمى مع المدونات الصديقة ده شرف ليا ربنا يبارك فيك
وشيل بقى تأكيد الكلمة, الدنيا حر ومش ناقصين خنقة
السلام عليكم ورحمة الله وبركاته
مهند باشا....جميل يا مهند إن اول تعليق علي المدونة الجديدة يكون منك
ودا هيفضل متسجل فيها طول ما هي موجودة
اتمنالك التوفيق اخي العزيز
جزاك الله خيرا علي المرور
دكتورتنا اجدع بنوتة
هي فعلا عيلة فقرية
بس علي نيتها اوي
ويارب تعجبكم
جزاكي الله خيرا علي المرور
وعليكم السلام ورحمة الله وبركاته
دكتورة خمسة فضفضة
الله يبارك فيكي ويجازيكي خير يا دكتورة
إن شاء الله الحلقات اسبوعية كل يوم ثلاثاء
بس يارب تعجبكم ومعناها يوصل للناس
مجرد تعليقك عندي دا شرف ليا يا دكتورة
جزاكي الله خيرا مرة تانية
عاشقة الفردوس
مفيش حد نكد في عيلة الفسافيس علي فكرة
كلها دمها خفيف
احنا هناقش فيها امور النكد والعكننة بخفة دم وهزار
زي ما قلنا دس السم في العسل
الله يبارك فيكي ويجازيكي خير علي المرور
مني
الله يبارك فيكي
اهو بقي من حظ الفسافيس
ناخد بالنا منهم شوية
جزاكي الله خيرا علي المرور
شيماء صاحبة الهمسات الدافئة
الله يبارك فيكي
احنا فعلا هنتريق للصبح
بس من غير هيافة...كلها هتبقي مواضيع ذات مغزي معين
جزاكي الله خيرا علي التهنئة والمرور
الاخت الفاضلة عاشقة النقاب
الله يبارك فيكي ويجازيكي خير
معلش أنا إتأخرت شوية في إضافة المواضيع
بس إن شاء الله كل يوم ثلاثاء هضيف موضوع جديد
وإن شاء الله تشرفينا ديما يا اختي الكريمة
جزاكي الله خيرا علي المرور الكريم
آدم الاسمعلاوي
جزاك الله خيرا علي قرائتك للبوست كاااااااملة
بس من غير حلفان انا مصدقك يا عم....انا بتكلم علي مواضيع تانية ونقاشات تانية خالص الناس بتدخل ترزع كلمتين وتمشي
يعني مجاملة وخلاص
بس انت غيرهم طبعاً
إن شاء الله اليوميات تعجبك
جزاك الله خيرا علي المرور
البوب
اخويا وحبيبي وقديمي واللي علمني العسكرية
ازيك يا بوب...ملازم اول ايهاب
الكبير كبير يا عم
انت فينك يا عم ايهاب
والله وحشني موت
بي انت عارف بقي انا في مصر علي طول....وبنزل مبيت كل يوم واخد شقة هناك ومتبهدل يا بوب
ادعيلي بقي اخلص علي خير
بس الحمد لله راحة نفسية عن الكلية وأنتخة
الله يبارك فيكي يا باشا وديماً كدا منورنا
الاخت الكريمة مجداوية...
هو فين الجاتوه دا يا ست مجداوية؟؟؟
طب مش تفوتي علينا حتتين...والا هما يعني الفاسفيس يكلوا وأحنا نتفرج
وهو مين دا اللي يقدر يعمل كدا معاكي من الفسافيس معاكي
دا انا كنت ادبحه
ايوة انا سمعت عن القاهرة والناس
يارب بس الفاسفيس يعجبوكي يا استاذة مجداوية يا مدرسة ابناء الملوك
وبعدين الشرف يبقي ليا اني اضع اسم مدونتك في المدونات الصديقة
يكفي انك اقترحتي حاجة جميلة وعجبتني وعجبت الناس في المواضيع
ودي حاجة تحسبلك في مدونتي
يبقي انتي من احق الناس بتشريفك المدونة
ربنا يجازيكي خير علي تشريفك المدونة
واتمني دوام زيارتك الكريمة
يا عم بس انت مقولتليش مجلة ايه دي اللي كانت هتنشرها
ودي من تأليفك؟
هههههههههه
انا متابع العيلة دي اما نشوف آخرتها معاهم و مع العيش
حقيقى الحكاية حلوة قوى وبتحكى الاسرة المصرية فى كتير منها ... وانت بصراحة اسلوبك آخاذ قوى ومشوق قوى ربنا يوفقك دائما فى عائلات الفسافيس ... وشكرا